China Teil 2 - Hongcun (7. - 9. Oktober 2014)

So ehr Fröchtlis ^^ noch fast 5 Mönet chond doch no de 2. Teil vo minere Chinareis.

För die wo nömm gnau wössed was s letschte xi esch wo ech steckeblobe ben, gehts en chlini "Uffröschig" haha:

Die ganz Troppe setzt imene Mini-Bus ond hend Presäntli vom Brutpaar (Schnapps & Schmock) verteilt becho. Weder alles klar? Sehr guet de möche mer etz witer :)

4. Tag en China (Reis Hongcun / Hongcun)

Wo d Fahrt los gange esch, hend zerst alli no chli gschwätzt ond send spöhrbar ufgregt xi. Mi Götti & d YY hend es paar chinesischi Läckereie (z.B. en Art Riisgebäck met Honig & Ei) verteilt wo üs de Honger bes zom Zwöschehalt vom Hals halte sell.

Wärt de Fahrt hani paar Sache gseh wo ech üch etz eifach metteile moss egal öbs üch passt oder ned - hend jo eh ke Wahl *wuhahaha*. Also s einte wo ech gseh han esch, dass d Chinese ehri Autobahne begrüenid i dem sie ad Autobahngländer Bluemechestli hänkid ^^ es gseht mega wetzig us (han aber leider kes Foti wo mers guet erkenne chan :/ ). S Andere woni no gseh han esch s Bougröscht be Hochhüüser. Wie secher die Meiste vo üch wössed send die en China us Bambus gmacht ond osseome chond es grüens Netz - was aber offebar ned zwengend ome si moss wells ned alli hend - ond dezue gehts abere gwösse Höchi emmer weder es paar vom Gebäude abstehendi Uffangnetz was secher grad be dene Hüüser ohni Netzhölle eim s Läbe rette chan - vorusgsetzt das mer grad dete usegheit wos au eis hed. 

Hochhüüser met de Luxus-Secherheitsvariante ^^

Wo ech de langsam es Höngerli becho han, hani das Riisteil probiert ond wenn ehr scho vorhär dänkt hend "läck tönt das schräg" chani nome säge: es tönt ned nor schräg sondern schmöckt au so ond werkelch ässbar esch es au ned xi. Denn hani chinesischs Schoggi-Popcorn abotte becho ond de hani mer dänkt sooo vell falsch cha mer jo be dem ned mache aber ech han mech leider gehrt....

Es Stöndli spöter hemmer denn de Zwöschehalt erreicht wos zom Glöck en chline Lade gäh hed.

Do alles mega gönstig xi esch, hemmer brutal vell igchauft ond zwor Sache wo mer gwösst hend das es fein esch ond au Sache wo schräg xi send ond mer dänkt hend "Los probiere!" denn schlemmer als das Riisteil chas ned wärde ^^. Vo all dene Probier-Sache hani mech vorallem of s Violette Fanta (Truubegschmack - be üs eschs glaub Cassis) und Gorke-Chips gfreut ond Leute ehr chönd üch glaub gar ned vorstelle wie GAIL das gschmöckt hed *-* ech han nochhär nor no Gorke-Chips welle haha.

Noch witere 3h esch de Bus of en Parkplatz gfahre (s Dorf esch autofrei) ond de hed jede sini Sache gno ond send rechtig Dorf gloffe. D Öberraschig esch gross xi wo mer stat en schöne "Dorfafang" ane Passkontrolle äne gloffe send wo mer sin Pass ond es Ticket förs Dorf hed mösse vorwiise - jo das esch ke Wetz me hed so z säge Itret mösse zahle för i das Dorf ine z cho ond de Name esch of en Liste cho. Wenn mer de ändlech denne esch hed mer en sehr schöne, chline See vor sech ond ganz velli chlini Hüüsli - so rechtig "chinesischi Stemmig" ^^ (Foti).

S Gepäck esch denn vomene Tuk Tuk abgholt worde ond mer hend de gmüetlech chönne dors Dorf laufe. Aber scho noch de erste Meter semmer chli "gschockt" worde well näbem Wäg eifach so en erwachsne Maa a  Bode ghuuret esch ond es grosses Gschäft verrechtet hed.....also em ländleche Teil möched das ned nor d Chend sonder alli.

s "Dorfscheld" ^^

Üses Hüüsli esch werklech mega höbsch gmacht xi ond d Bsetzeri esch meega nätt xi ond sie hed mega en knuffige chline Hond gha wo mega jong xi esch ond dor das au mega verspelt.

Mer hend de ehre au nomol mösse d Päss abgä ond de semmer nomol per PC be de Polizei registiert worde (wieso hed e-wie keine göwsst aber jo China halt ^^) ond de hemmer üsi Zemmer döffe bezieh. Es send eher Zemmerli xi aber sehr süess & suber. Mer hend es doppelstöckigs becho aber wo de Michèle & Ech i de ober "Stock" gange send hemmer eifach es chlises Mättali am Bode met Dechi atroffe ond das be ca. 1m Ruumhöchi haha mer hend üs de seehr of d Nacht gfreut.

Noch dem sech alli chli igrechtet gha hend hemmer üs em Vorrum troffe zom nochhär zäme is ander Hüüsli öber go Znacht ässe. Das Znacht esch nomol was ganz anders xi als das wo mer bes etz so gha hend aber es esch werklech alles bes of de Stenkfesch (dä heisst werkelch so ond är macht sim Name alli Ehr) sehr fein xi ond hed satt gmacht.

Am Obe hed üs mi Götti no chli s Dorf zeigt (do är scho mol dete xi esch) ond es esch brutal ruehig xi es send eifach fast ke anderi Mönsch me onderwägs xi ossert mer ^^. Chli spöter semmer de andes Lädeli äne gloffe ond dete hemmer üs de alli es Glace gchauft ond i dem Lädeli send no zwöi Meitli xi wo de mega schüüch zo mer cho send metem Handy wos metem öbersetzer gfrogt hend öbs es Foti mache döfid - mega süess hihi. Klar hani jo gseid ond be de fast verdröckt worde wells so freud gah hend ond nochem Fotoshouting ;P semmer de weder witer gloffe.
S zrog fende esch de trotz mim Götti ned so eifach xi do be Nacht nomol meh alles glich usgseh hed onds eifach brutal vell chlini Gässli geht aber mer hends de doch no gschafft gha. Em Zemmer hed üs denn die nöchst Öberraschig erwartet: a de Wand näb de Matte vo de Michèle & Mer esch en Spenne xi wo Handgross xi esch O.O ond natürlech hemmer so ned chönne schlofe ond somet hed mi Vater sie mösse ifoh ond usem Zemmer schmeisse hihi.

 5. Tag en China (Hongcun)

Am Morge send mini Mam & Ech mol go luege was als "Zmorge" geht. Üsi Kollege-Fameli esch scho dete gsässe ond hed nor so gseid das es ässbar seg. Es hed denn so en komischi violetti Riispampe gäh wo nor met verdammt vell Zocker hesch chönne ässe ond s "Brot" esch ned schlächt xi aber för üs wohl eher als Teigtäsche z nenne xi hihi. Nochem Zmorge semmer zäme (mini Fameli & Kollege-Fameli) chli dors Dorf gloffe ond hend es paar Rüüm agluegt wie z.B. d Aula vo Hongcun (Fotis). Dete hemmer de vo paar Anderne us de Troppe erfahre das sie en Panda Ufzocht gönd go aluege. Mer send denn au met gange aber ech glaube ech erspare üch nomol devo z verzelle wie schlemm das es dete xi esch ond gange grad witer zom nöchste "Usflog".

Aula vo Hongcun - Hauptsaal

Aula vo Hongcun - Hauptsaal

Aula vo Hongcun - Iigangstafele vo inne

Aula Hongcun - Iigangstafele vo osse

Bem Röckwäg semmer de frühener usem Taxi usgstege ond dor d Riisfälder zrog gloffe. Die send werklech sehr schön xi ond esch intressant xi mol z gseh wie das ganze pflanzt & gärntet werd (Foti).

Am ändi vom de Riisfälder hed de weder üses Taxi üs ufglade ond hed üs de s Natel vo sech gäh wo d YY dra xi esch & üs gseid hed das är üs grad witer fahri zom Bambuswald wo mer de alli zäme Znacht essed. De Wäg zo dem Bambuswald esch meh als kriminell xi - grad so +/- es Auto breit ond of beidne Site gohts de eifach s Loch derab ond es geht dete ke Leitplankene oder so ^^'.

De Bambuswald esch meeega genial xi :D ech han nonie so vell Bambus of einisch gseh ond s wetzige esch xi, dass es am Hang a usgseht als wördid Bambusbäum fast rächtwenklig zom Bode usewachse haha (han leider kes Foti dos fast scho z donkel xi esch zom was z erkenne). S Ässe esch glaub so zemli s Beste chinesische Ässe xi woni of de ganze Reis gha han. Es hed zor Abwächslig mol vell Gmües gäh ond ned nor emmer tonnewiis Fleisch *freude*.

Wo mer nochem Ässe weder Hei gfahre send esch es stockdonkel xi ond üs esch es sooo krass onwohl xi be dere Fahrt well 1. be de "Bärgfahrt" zo de Stross abe so schmal xi esch (wie bereits erwähnt) ond etz no dezue so donkel ond 2. well die Lüüt dete werkelch en seeehr spezielli Fahrwiis hend (sehr nätt usdröckt ^^) - es werd praktisch emmer i de Metti oder sogar komplett of de Gägefahrbahn gfahre ond eifach dezue emmer schön vell huupe ond Tempelimitte oder Aschnalle esch dete gar kes Thema haha s Motto esch wohl: eifach Fahre de Räste ergeht sech vo ellei! xD
Üses Motto esch de (mängisch wortwörtlech) xi: Auge zue ond döre! hahaha

Em Dorf Hongcun acho hemmer grad no en Mondfenster met erläbt was ächt cool xi esch wells werklech keine gwösst hed onds so en schöni Öberraschig xi esch :). Nochhär semmer chli dors Dorf gloffe ond send so ane Art Theater äne gloffe. Es esch schön gmacht xi aber esch sehr dramatisch xi (d YY hed üs de gseid das om en Muetter goht wo ehri Tochter verlürt) ond drom semmer ned so lang dete gstande (hend jo au kes Wort verstande). Witer enne vom Dorf hemmer (Kollege-Fameli & mini Fameli) de weder das Lädeli gfonde vo Geschternacht. Ech han das Mol grad en Grossichauf gmacht (Zmorge, Reisevorrot & en huufe Süesses ^^). Wo mer denn use cho send hemmer en halbe Schock gha, well die zwöi Meitli weder do gstande send aber ned ellei sondern met ere ganze Klass O.O...mer send denn eifach nätt lächelnd verbi gloffe ond de send üs eifach alli noche gloffe aber ned nor das...es paar vo ehne hend sech denn eim a arm klammeret ond de z.B. (be mer) gseid "I love you, my sister" was eim de langsam werklech z schräg worde esch ond mer üs de "befreit" hend ond i die ander rechtig gloffe send. Natürlech send de weder alli hendenoche cho aber wenigstens ohni chlammere ond wo mer de weder bem Lädeli xi send hends de doch trout z froge wägem Foti. De hani met jedem einzelne es Foti & am schloss no es Groppefoti gmacht ond de hemmer de döfe ohni Begleitig witer laufe. I dem Momänt eschs werklech brutal schräg xi, etz chömmer ali dröber lache ond e-wie eschs jo au süess xi das so Freud gha hend wells mol es paar Wiisi gseh hend aber jo ^^.

So zom Abschloss vom Obe ond au wells de letscht Obe en Hongcun xi esch, semmer is Kaffi vo Hongcun no eis go trenke ond hend üs de sogar em Gästebuech verewigt ^^ (hend zerst änglich welle aber do die Lüüt ke änglisch chönd hemmer de doch schwiizerdütsch gschrebe - Foti).

 6. Tag en China (Hongcun/Reis Huangshan Mountain)

Am nöchste Morge hani mis "Zmorge" vom Lädeli gmacht (en Art warmi Schoggi wo mer met Heisswasser hed mösse uffölle) ond do das Deng so heiss xi esch, hani de Starbucks-Ring wo ech emmer em Portmonai han dra do ond s wetzige esch xi das alli Kafi-Sochtis mech agspronge hend wells werkelch s Gfühl gha hend es heig do ergendwo es Starbucks *grins*.
Nochhär eschs de au scho weder losgange met de Fahrt zom nöchste Halt - Huangshan Mountain.


China Teil 3 - Huangahan Mountain folgt....

Laaaaaaaange Zeit

De letzti Blog esch werklech scho ewig här Linda :O also do jetz wie versproche eine vo mer :)
 Also am beste verzelli mol chli was so abgoht done in good old switzerland :P

 Ech fange am beste i mim Zimmer ah und go de immer wiiter use bis Europa :).

 1. WG-Zimmer

Also mis WG-Zimmer wird langsam wohnlech, und ech fühl mech (meistens) wohl & "deheime" ide WG. Die letze paar Woche / Täg hani am Anfang no flissig met lerne verbracht (höt hani mini letzti Pröffig gha), doch met de Ziit beni emmer fuuler worde und am Schluss hani gar nömme glern und mini Ziit met "procrastination" verbrocht :). Und jo i dere Ziit hani au entschede, dass ech nümm Biologie wiiter studiere. Ech go abHerbst 2016 de ad Fachhochschuel für soziali Arbeit in Zh, und für das bruchi no eis Johr arbeitserfahrig im ne soziale Betrieb. Es stört mech aber völlig ned, nomol es Zwöschejohr z mache, well studiere cha scho uhuuuuueeere langwiilig si^^... Ech blibe aber do in ZH ide WG wohne und gang ned zrog uf Luzern. Wenni scho mal dehei uszoge ben denn blibt das au so^^.

2. WG

Ide WG lern ech langsam die positive aber au negative Siite vo mine Mitbewohner kenne ;). Es ged langsam e Interessekonflikt WIE suuber s Wohnzimmer sett sii, und wie vell Deko sett ome henge. Ei Metbewohner hed sehr strikti Vorstellige und wett überhaupt kek Deko, was ech ergendwie chli langwiilig fende. Ech weiss nömm öb dech a eusi Treppe chasch erennere, jedefalls die esch grusig grau, und mer hend farbigi Partybänder det äne ghänkt, zums chli gmüetlecher mache. Das hed ehm gar ned passt und de hed er en hässleche graue stoff under d Treppe gspannt... Naja, muss er selber wösse für was er Geld usged :P. Und au in sache abwäsche esch er ned sehr chillig druf, gemäss ehm muss mer IMMER ALLES SOFORT abwäsche, aber ech due ame lieber all mis züg uf einisch ab obe mache well für 1 Täller lohnt sechs ja gar ned werklech afo abzwäsche xD. ABER ha au no gueti News us de WG: min verscholleni Jonglierball esch weder vöre choo :D.

3. Schweiz

Es esch sehr chalt! Vor Silvester und au am obe selber hemmer meega vell Schnee gha :/. Esch zwar schön zum aluege wenn dinne hocksch, aber sobald use gosch: brrrrrrr! Ech ha Silvester ide WG verbrocht, zeme met de 2 St. Galler Metbewohner (Marco & Myriam) und de esch no de ander Marco und d Kati choo! Es esch mega cool gseh, glaub eis vode coolste Silvester woni je gha han. Eifach well alles so spontan gse esch, mer nüt planet gha hend und eifach grad das gmacht gha hend womer Lust druf gha hend :D. Zerst semmer dinne gsee & hend eifach Blödsinn quatscht etc. Und mer hättet fast Mitternacht verpasst :D. Denn simmer use uf e Hügel go s Füürwärk luege, am ne Ort wo no viel anderi Lüt gse send und mer send ufeme Bänkli gstande und hend we Idiote emmer "aaaahhhhh" und "ooohhhhh" gseid wenn mer weder öpis am Himmer gse hend xD.
 Also söst esch glaub ned vell interessants ide Schwiiz passiert. Ah doch: wos ganz vell Schnee und Iis gha hed esch es Tram i ZH entgleist. Und s SRF hed dröber brechtet und gseid, sie hend no kei Ahnig oder Vermuetig wieso dass das Tram entgleist esch. (Es chönt ja ned evtl am Schnee legge, hmmmmmm?)

4. Europa

Europa spinnt momentan völlig verrückt.
Zerst entstoht us em nüt use in Dütschland e Gruppierig namens PEGIDA (=patriotische europäer gegen islamisierung des abendlandes.) De Name esch au ehres Programm, also ghaltlosi und stupidi Frömdefeindlichkeit. Die gönd JEDE Mäntig go "demonstriere" und nenned ehri "Demos" Abendspaziergänge. Ech schrib Demos absechtlech i Afüehrigszeiche, well das i mine Auge eifach e Huufe angstverbländete Mönsche esch wo jede Mäntig ufd Stross goht aber eigentlech kei Ahnig hend was sie eigentlech wend bzw was mer konkret chönt verändere. Und vor allem nähmed die Lüt Wörter is Muul wo scho ide Nazi-Ziit verwendet worde send, wie z.b. "Lügenpresse". Ide meiste Städt sends jedoch ned so beliebt, d gägedemos hend ame vell meh Lüüt. Usser in Dresden, det geds jede Mäntig ca 300.000 Pegida ahänger :/. Ide CH hed d Pegida die ersti Demo uf de 16. Februar agsetzt, aber es esch sech au scho e Gegedemo am plane :).
 Jedefalls, s zwöite wechtige wo no passiert esch: in Frankrich heds e Terroraschlag uf es Satire-Magazin (Charlie Hebdo) gäh. Verüebt vo radikale Islamiste. Sie send is Redaktionsgebäude vo dem Magazin und hend mehreri Journaliste/Zeichner etc abknallt, und au Poliziste. De tragisch Vorfall esch de natürlech grad vo de Pegida-Idiote usgnötzt worde, zum allne zeige dass sie "recht" hend med ehrne absurde Ängst...

Ech weiss voll ned, wie vell mer usserkontinental vo dem Mitbechont, was do in Europa so abhoht? Well mer bechömed eigentlech voll nüt met was i Australie so lauft^^.

Also ech hoffe jedefalls dass sech d Lag do bald weder beruhigt und alli weder normal "ticked" :).


Bisdanne


Noch n paar Fotos:

skiferie... aber kei schnee

nur ganz obe esch 1 piste offe gse

deför schöni sonne untergäng

Schnee vor de WG (uf fb heds no besseri pics^^)

mini Anti-Ablenkigs-Cheste (esch alles denne wo mech vom lerne abglenkt hed...)

...damet s Pult läär vo ablenkige esch :D

ahh miis bett ech liebs :D chönt de ganz tag drenn blibe :D

de möti euse WG-Frosch

das ominöse tuech unter de stäge :D

de WG briefchaste wo mer zätteli cha ine schmeisse wo alles mögliche druf stoht

mit selber zeichnete härzli liebi ide WG verbreite :D

<3

Jesses Gott

Lieeeeeebi Fröndeee

Mein Gott das esch jetzt au scho lang här das mer Blogiträg gmacht hend.
Liebs Fränzi, du hesch doch oft öbbis metteilt. Was gohd be der so ab? Es wärd mech echt wonder nä, do du jo au nömm i de Groppe besch.
Aber au a die andere, was gohd be üch so abb??

Wiehnachte esch das johr andersch strub gse. Ech hans meh oder weniger elei gfiired. Was aber au easy gse esch. Aber mini Eltere hend mer fötali gscheckt vom esse wo sie in süditalie hend ond halt die stemmig vermessi scho mega.

aaah öbirgens!!!
Ech gseh höt Camila. Hrhr. Ond mer verbrenged Silväster zäme. Oh mein gott das werd cool.
Ah ond ech ha ghofft dasi Wiehnachte im Bikini cha verbrenge, so warm eschs do in Melbourne denn doch ned gsi xD haha.
Schaaaaaad.
wie hend ehr so wiehnachte verbrocht? ech freue mech öber Comments!!!
vo üch allne.
jede.
einzelne.
Was hender so becho?
Aso ech han es Video vo de Olivia becho ond en Aruef vom Cyril. Ond ech glaube, das esch mis beste wiehnachtsgschänkli ever gsi. haha =)
auso gueet. tschou tschou.
ech verzell üch de wies gsi esch met de Camila ond was sie mer so verzellt hed.

China Teil 1 - Nanjing (4. - 7. Oktober 2014)

So mini Liebe ech nehme mer etz die Zit ond schriebe öber mini Reis en China :). Do aber das Ganze zemleche lang chönnt wärde han ech mer öberleid, dass echs i 4 Teil ufspalte ond zwor noch de Orte wo ech xi ben. So werds chörzer ond au öbersechtlecher öber wele Ort ech grad en Roman verfasst han haha ^^ ech hoffe ehr wärdid üchi Freud dra ha.

Ech fange ganz am Afang be de Abreis a :)
Noch dem mers met all üsne Koffere a Bahnhof gschafft hend, semmer vo minere Grossmuetter öberrascht worde ond natürlech heds devo es Foti mösse gäh (1.Foti). Om so nöcher mer em Floghafe Zöri cho send om so meh semmer alli nervös worde ond das hend glaub werklech alli am Zog afo merke (öbs hend welle oder ned ^^). Am Floghafe sälber hemmer zerst en Momänt brucht bes mer üs hend chönne orientiere aber denn esch alles sehr schnell gange ond mer send chorzerhand em Passagier-Bereich vom Floghafe glandet wo mer üs de öbis ässbars gsuecht hend zom d Flogmedis chönne z näh. Chorzi Zit spöter semmer alli of üsne Plätz em Flogi gsässe ond hend of de Start gwartet. Mer hend leider liechti Verspötig gha aber schöst esch de Flog tip top xi ond ech han sogar e chli chönne schlofe was ech nie erwartet hät :).

1. Tag en China (Shanghai / Nanjing)

Z Shanghai acho hemmer üs of de Wäg of Nanjing "mösse" mache ond das wär angäblech 1h metem Schnellzog xi. Naja so ganz hed das ned gstomme...leider. Mer send 7:05 en Shanghai glandet ond denn ca. 16:00 en Nanjing a cho O.O okey mer hend fast 2h am Bahnhof z Shanghai mösse warte aber trotzdem esch es vell länger gange als dänkt ond das hed üs rächt fertig gmacht metem ganze Gepäck wo mer gha hend - vorallem d Metro esch brutal xi ^^'

Em Hotel z Nanjing a cho eschs lang gange bes mer of üsi Zemmer hend chönne ond zwor well die sehr schlächt änglisch hend chönne aber jo hed de doch klappet. D Zemmer send werklech schön xi (4 Stärn Hotel) ond mer hend üs rechtig ofs Bett gfreut *-*

Ech han mech bem W-Lan agmäldet ond grad mim Götti gschrebe, dass mer alli guet acho send ond em Hotel send. Spöter hed är mer antowrt gäh ond gseid das mer üs alli i de Lobby treffed ond de gönd go Znacht ässe. Mer send denn id Lobby abe ond hed de Götti ond sini Frau begrüesst ond hend de no grad alli könne glehrt wo bereits ome xi send. Zäme semmer denn chli is Zentrom vo Nanjing gloffe ond dete ines Teehuus gange. Es esch werklech sehr süess igrechtet xi ond hed so gmüetlech usgseh. Mer send de ine seperate Ruum brocht worde wo mer för üs ellei xi send. D YY (de Spetzname vo de Frau vo mim Götti) hed denn s Ässe för üs alli bstellt ond mer hend eifach gässe was us uftest worde esch. Es esch ned mol so schlächt xi ond es hed sogar extra för üs Riis dezue gäh (das esch en China schöst öberhaupt ned üblech - Riis esch es Zeiche das mer arm esch). Mini Fameli & ech send jedoch so müed xi, dass üs ned so liecht gfalle esch met de Stäbli ^^.
Wo mer weder zrog rechtig Hotel gloffe send, hemmer so chli usgfrot öber China ond de plötzlech stoht so en chline Bueb paar Meter vor us ond hed zwösche de Hosebei eifach en rise Schletz ond nüt dronder O.O!! Denn seid mer mi Götti, dass das do normal esch well sech d Lüüt ke Wendle leiste chönd ond de möcheds de Chend en Schletz id Hose demet sie jederzit ond öberall ehres Gschäft chönd verrechte...das hed mech mega schockt...! Nochhär semmer alli i üsi Zemmer zrog go schlofe.


2. Tag en China (Nanjing)

Am 8:15 esch de Wecker abgange ond somet üsi Motivation zerst mol a üs verbi ghoppst. Mer send emmer no tot müed xi aber wer Zmorge emene Hotel möcht moss eifach ufstoh -.-
9:00 stömmer em Restaurant vom Hotel ond störzed üs ofs Zmorge-Buffet aber wo mer de am ässe xi send, hemmer gmerkt das es ned grad vell met üsem Zmorge ähnlech hed (leider) ond zwor us folgende Grönd: s Brot esch sehr süess xi (kennid äbe ke Brot), de Anke total gsalze, Spiegeleier met extra Gotsch Öl obedruf, Kaffi esch Spüelmettelmässig xi & d Melch hesch au ned chönne trenke (Soja hani halt ned gärn) - en China nehmt mer zom Zmorge entweder Nudelsoppe oder Riis met Gmües...naja ech be ned so die wo warms Zmorge chan ässe.
Nochem Ässe hemmer üs no schnell metem Götti & de YY onterhalte ond de nochemene chorze Stopp em Zemmer semmer eifach mol dor Nanjing gloffe.

Mer send de no ines Ichaufszenter gange aber leider alles so tüür das meh Verchäufer als Chäufer gha hed. Ech han ofs Wc mösse aber woni de s Wc gseh han, hani nömme mösse (eifach es Loch em Bode wo mosch dröber stoh ond das hani ned welle). Nochhär semmer met de Metro no chli witer is Nanjing Zentrom, wo mer paar Sehenswördigkeite hend welle go aluege. D Charte esch ned so super xi ond de semmer leider chli falsch gfahre aber mer hends de schnell gmerkt ond send de eifach i die ander Rechtig gloffe. Ofem Wäg dethi chond üs en Lastwage entgäge, blibt stoh hornet 3x ond de gsehsch wie alli Lüüt scho fast panisch of d Site sprengid (ab de Stross, hender Autos) also hemmer dänkt möched das etz eifach au mol ond zom Glöck hemmer das gmacht, well dä Lastwage esch de los gfahre ond hed hende use Wasser sprötzt (wie be üs Salz em Wenter) ond das bes 1m ab Bode! Plötzelch merk ech, dass es e-wie noch Desifiziermettel schmöckt ond tata die mönd d Strosse desinifiziere well alli ständig öberall hi möchid ^^ mer hends fast ned chönne glaube.

Ofem Wäg zom Zhanyuan Garte hemmer chli orientierigsschwerigkeite gha ond das esch inere Studäntin ufgfalle ond esch de of üs zue cho ond hed gfrogt öb sie üs hälfe chan (sehr schwerig zom verstoh xi). Mer hend de chli versuecht met ehre z rede ond de hed sie üs gseid, dass sie chli änglisch lehre möcht i dem sie met de Toureste versuecht z rede (was secher ned grad vell de Fall esch, wells fast nor chinesischi Toureste hed). Das hemmer mega süess & schön gfonde aber leider hemmer ned vell meh met ehre chönne rede well sie eifach ned meh änglisch hed chönne.
Fotis vom Zhanyuan Garte, "Shoppingströssli" & Zhonghua (Drache) Muur:

Am Obe esch s erste Fästlecheässe xi, die meiste send aber ned so fästlech agleid xi ossert mer natürlech ^^' . Nochere 10min Taxifahrt semmer bem Restaurant a cho, es esch mega gross & schön xi, denne heds so en Innehof gha wo en schöne chinesische Garte xi esch, wie mers vo de Felm kennt. Wo mer de i Speisesaal cho send, semmer froh xi das mer so schön agleid xi send well das au alli Chinese xi send (puh Glöck gha). Be üs am Tesch esch en Schuelkolleg vo mim Götti xi wo met sinere Fameli of Australie ;) usgwanderet esch (bes of är hend alli nor änglisch chönne). Mer hends super am Tesch gha aber s Ässe esch zom Teil chli speziell xi (z.B. Froscheiersoppe - sehr schliimig :S ). Nochem ässe semmer dethi gloffe wo mer am Nomi scho xi send ond das esch witwäg xi ond ech met höche Schueh (juhu -.- han am schloss nömm chönne laufe wäge 8 Blotere). Dete semmer denn ofs Boot ond ca. 1h de .... Muur entlang gfahre - sehr schön xi met all dene Liechtli :).
Noch de Bootsfahrt semmer of de Bus gange ond Leute ehr send nonie emen volle Bus xi wenn ehr ned dete emene volle Bus gfahre send...ond denn esch weder Schlofenszit xi ^^ .


3. Tag en China (Nanjing)

De Morge esch weder glich verloffe ossert dasi das Mol en riiiise Schale Müesli met "Joghurt", sehr vell Fröcht, 1 Schiibe Toast (weniger süess als de Räste) & es Glas Orangesaft gno han.

Am Nomitag semmer no mol i das Shoppingströssli ond das Mol metem Bus (Abenteueralarm well d Statione nor chinesisch send) aber mer hends gfonde, dank Omgäbig erkenne ^^.
Dete a cho hemmer velli Ässstäbli gchauft (au för Verwanti), chinesischi Snack (en Art Chips am Stäckli & spezielli Fröcht am Stäckli) gässe, mis mini Täschli gchauft, Confuzius Tempel agluegt & för Fotis äne gstande aber üses Ziel (Flip Flops för mech) hemmer ned erreicht, well sie das ned so kenned aber jäno.

Nochhär semmer metem Bus weder zrog is Hotel & hend üs för d Hochzit fertig gmacht. Danke chorzfrestigi Planänderige hemmer zom Hochzit mösse laufe (30min - zom Glöck hani Blotere & dor das ned mini 10cm Schueh a gha ^^' ).

Dete a cho heds zerst mol Fotis gäh metem Bruutpaar ond nochhär hend Gäst i Saal ufe mösse ond ehre Tesch sueche. Mer hend zwor Teschnommere becho wo d Schwiizergäst platziert send aber leider hed das hende & fohre ned gstomme....ehr chönd üch sälber usdänke wie vell Tesch mer be 200 Gäst hend mösse sueche bes mer üse gfonde hend (natürli eschs de letscht xi thaha).
Do de Götti & d YY en China ehri Ehe nor iträge mönd, heds "nor" d Fiir gäh ond zwor so:
Als ersts lauft s Bruutpaar öber en Stäg of d Bühni wo denn de Brütigam d Bruut öber es Füür führe moss (das symbolisiert, dass d Frau so alles Schlächti hender sech lohd ond so z säge rein i die Ehe goht) ond denn mönd sie sech vorem Tesch vo de Eltere/Schwegeeltere verneige.
Noch dem goht s Bruutpaar weder use ond Gäst fönd metem Ässe a. Chli spöter chond s Bruutpaar omzoge weder zrog i Saal ond weder of d Bühni. Dete mönd sie jewils de Schwegeeltere (weli etz äbefalls of de Bühni send ond zwor amene Tesch) Tee serviere ond debi mönd sie vor de Schwegeeltere of de Chnüü si (Foti). Wenn das abgschlosse esch mönd alli nomol of d Bühni (Bruutpaar & Eltere) ond ehri Glöckwönsch em Bruutpaar öbermettle.
Noch dem döfis d Eltere weder a ehre Setzplatz zrog aber s Bruutpaar cha no ned absetze. Nei sie mönd zerst a jedem Tesch go astosse ond zwor met chinesischem wiisem Schnapps (52%) ond das be 200 Gäst ^^'. I dere Zit gehts mehreri Darbietige & Wettkämpf (well mi Papi be eim metgholfe hed hemmer en riise Poppe vo ehm becho vo dem wo mer gholfe hend - Foti).
Noch knapp 2h hend alli Chinese gässe gha ond somet gange ond zwor wie ofs Komando send eifach alli use ond das ohni es Tschüss a ergendwer aber das esch ned onaständig oder so, sondern so macht mer das en China - 2h ässe ond de weder verschwende ^^.
Mer Schwiizer send alli no dete ghocket ond s Personal hed bereits alles abbout & s Ässe abgruumet haha so rechtig etz esch fertig gönd hei.

Noch de Hochzitsfiir send aber d Schwiizer & es paar jongi Chinese (Frönde & Cousine) no witer ond zwor ine Karaokebar :D. Ech be nonie i einer xi aber es esch ächt wetzig xi ond es esch wohr: Chinese spenned total of das haha. Mini Fameli & ech send bes am 01:30 dete blobe (ech wär gärn no länger blobe aber Schlössutechnisch esch das ned gange).

Am 02:00 semmer de em Hotel xi wo mer de no chli Koffere packt hend demet mer am Morge ned no frühner ufstoh mönd :).

4. Tag en China (Nanjing / Reis Hongcun)

7:00 esch de Wecker abgange -.- mer send tot müed xi...
Mer hend üs "Zmorgetauglech" gmacht ond denn alles Rästlechi no fertig id Koffere gstopft ond denn is Restaurant abe go Zmorge ässe, was so xi esch wie emmer ^^ nor das es vell liisliger xi esch als schöst amigs haha. Nochhär nomol alli is Zemmer zrog, denn go uschecke ond warte.
Plötzlech esch de Götti & d YY doch no uftaucht, sie send bes am 05:00 dete xi wie mer de erfahre hend ^^ . Denn hed d YY no paar Sache organisiert, för üs z.B. en Bus wo de vom Bärg (spötere Zitponkt) of Shanghai fahrt ond no paar Sache wägem Bus wo mer etz witer fahre wärdid.
Ech han mech de entschlosse no i Starbucks wo paar Meter entfärnt xi esch z go ond en rechtig gueti Heissi Schoggi go z hole *schmacht*. Em Starbucks hed mer denn fast alli vo üsere Troppe atroffe well jede en Kaffi oder schöst was zom verwache brucht hed ^^ . Wo mer alli zrog cho send, eschs au scho los gange metem Bus, alles verstaut eschs los gange met de 6h Busfahrt noch Hongcun ^^'.
Em Bus hend de Götti & d YY de no allne es Hochzitsbresäntli öberreicht (Manne Schnapps & d Fraue handgmachte Schmock wo vo ehrem Cousin d Fröndin gmacht hed - Foti).

Leben ist...

Jaja, ich weiss, scho weder en post vo mer^^. Aber muss das jetz eifach schnell teile wonii gfonde han! :) A mim Laptop esch mer es Dokument met em grossgschriebne Titel "LEBENSPLANUNG" is Aug gstoche! Was drinn stoht gsehnd er uf em Bild :D. S Zitat "Leben ist das, was passiert, während du eifrig dabei bist, andere Pläne zu machen" (vom John Lennon oder Goethe oder wer au immer) stemmt demfall allemal. Ech han weder fürd Migros, no imene Kinderheim in England und au ned imne Krankehuus gschaffed. Ärzte ohne Grenzen esch zwar immer mo e Traum vo mer, aber de esch erstmal id Ferni gröckt. Und mit em Studium hani jetzt scho agfange und ned est i 2017 :P. Das Dokument hani öbrigens vor ungefähr 2 Johr erstellt, also Afangs 6. Kanti. I dere Ziit wo ech Null Bock uf Schuel und Studium gha han und no voller Hoffnige für mini Zuekunft gsii ben :D

Kürzester Blog ever

Es gibt Haarklammern, die sehen aus wie Post-its!
Fertig!